My Lasting Minutes

Nag vir nag
spalk jy my naakte rug
oor die brandstapel
van jou vlamlose altaar
My vrouwees geannihileer
met vrees wat my lippe 
klepperend laat vibreer
Jy gespe jou louerkrans
met jou klepeltong om my nek
My borste die pelu vir jou hoof
om teen te rus
terwyl jy baatsugtig en ritmies
teen my pelvis sus
Ek ruik die reuk van haat
jy stink na neutmuskaat
Buite die venster klapwiek
'n pronkduif seurderig
sy sirkelvere
tot 'n roethoepel van as
Ek bid vir die aubade
en ek bid vir genade
uit hierdie Hedas
My offerande in sieleleed
neem ek weg van jou gekleed
na waar ek jou as Pandora
kan gaan wreek
Waar die passaatwind
selibate skuiling kan bied
aan my
en ons ongebore kind

© Roxy Van Zyl - 25/08/2024